அறவெண்பா!
🍁🍁🍁🍁🍁🍁
அறநெறி யாதென ஆய்ந்திடல் நன்றாம்
குறளைத் துணையெனக் கொண்டே!- குறையுள
ஆரியப் பண்பை யகற்றிட ஓங்குமே
நேரிய நல்லறம் தான்.
வாய்மையும் ஈதலும் வாழ்வறமாய் ஏற்றுநிதம்
தூய்மை மனத்தார் துலங்குவார் !- ஆய்ந்துநல்
அன்பே உயர்ந்த அறமெனக் கொண்டுலகில்
இன்பமாய் வாழ்தல் நலம்.
உயிர்களிடம் அன்புசெயல் உள்ளத்தில் தூய்மை
முயன்றுநிதம் கொள்வீர் முறையே! - நயமிலாக்
காமம் வெகுளி களைந்து துணிவுடன்
தீமையை மாய்த்தல் சிறப்பு.
அன்புடன்,
பாவலர் அ. யாழ்த்தமிழன்,
புதுச்சேரி
வெண்பாக்கள் அனைத்தும் அருமை. ஒவ்வொரு வெண்பாவுக்கும் வண்ண எழுத்துகளின் தேர்வு அருமை. பாடல்களைப் பதிவேற்றம் செய்வதிலும், வரிகளுக்கு வண்ணம் தருவதிலும், நிழற்படத்தைப் பதிவேற்றம் செய்வதிலும் நல்ல தேர்ச்சி காணப்படுகிறது. மொத்தத்தில், நான் எதிர்பார்த்ததைவிட மிகுந்த முன்னேற்றம் !
பதிலளிநீக்குஒவ்வொரு வெண்பாவின் தலைப்பிலும் பாடல் என்ன வகை வெண்பா என்பதைக் குறிப்பிடலாம் – தனி வண்ண எழுத்துகளில் ! பாடல்கள் எளிமையாகத்தான் இருக்கின்றன. இருந்தாலும் பாடலுக்கான கருத்துரையை, பாடலை அடுத்துக் குறிப்பிடுவது சிறப்பாக இருக்கும் – பாடலைப் படிக்கும் வலைப்பூ நண்பர்களுக்கு ஈர்ப்பை ஏற்படுத்துவதாக இருக்கும் !
எளிதில் பொருள் விளங்காச் சொற்கள் ஒன்றிரண்டு இருப்பின் அவற்றுக்கு மட்டும் அருஞ்சொற்பொருள் , கருத்துரையை அடுத்துத் தரலாம் !
தங்கள் முகநூலில், வலைப்பூவின் இணைய முகவரியை அடிக்கடி வெளியிட வேண்டும். அம்முகவரி உங்கள் நண்பர்களின் பார்வைக்குச் சென்றால்தான், அவர்கள் வலைப்பூவைத் திறந்து பார்த்து படித்துச் சுவைக்க வாய்ப்பாக இருக்கும்.
பாராட்டுகள் ! வாழ்த்துகள் !
மிகவும் நன்றி ஐயா மகிழ்ச்சி. உங்கள் கருத்துரைப்படி தொடர்கிறேன். தங்களின் பேரன்பிற்கு மிகவும் நன்றி ஐயா மகிழ்ச்சி.
பதிலளிநீக்குஇறுதி அடியில் மட்டும் சற்று கவனம் செலுத்தவும் மற்ற அனைத்து அடிகளும் சிறப்பாக உள்ளது
பதிலளிநீக்கு